ആൽപ്പാറ സെന്ററിലെ അപകടക്കുഴിയിൽ വീണ് യുവാവിന് പരിക്ക്; പ്രതിഷേധവുമായി നാട്ടുകാർ

പട്ടിക്കാട്. ആൽപ്പാറ സെന്ററിലെ അപകടക്കുഴിയിൽ വീണ് ചാണോത്ത് സ്വദേശിയായ യുവാവിന് പരിക്കേറ്റു. രാത്രി എട്ടരയോടെയാണ് അപകടം ഉണ്ടായത്. പീച്ചി ഭാഗത്തേക്ക് പോകുന്ന വഴിയാണ് അപകടം ഉണ്ടായത്. ഇയാൾ സഞ്ചരിച്ചിരുന്ന സ്കൂട്ടർ റോഡിലെ കുഴിയിൽ വീണ് നിയന്ത്രണം വിട്ടതിനെ തുടർന്ന് മറിയുകയായിരുന്നു. റോഡിലേക്ക് വീണ യുവാവിന്റെ കൈയ്ക്കും കാലിനും സാരമായി പരിക്കേറ്റു. 

അധികൃതരുടെ അനാസ്ഥയാണ് ആൽപ്പാറ സെന്ററിലെ അപകടങ്ങൾ തുടർക്കഥയാകുന്നതിന് കാരണമെന്ന് നാട്ടുകാർ ആരോപിച്ചു. നിരവധി വാഹനങ്ങൾ കടന്നുപോകുന്ന റോഡിലെ കുഴിയടക്കാൻ താൽക്കാലിക സംവിധാനം മാത്രമാണ് നിർമ്മാണ കമ്പനി അധികൃതർ നടപ്പാക്കുന്നത്. മഴ പെയ്യുന്നതോടെ കുഴിയിലെ മെറ്റലും മണലും ഒഴുകിപ്പോവുകയും ഇവ റോഡിൽ ചിതറി കിടക്കുന്നത് കൂടുതൽ അപകടങ്ങൾക്ക് വഴിയൊരുക്കുകയും ചെയ്യും. മാത്രമല്ല പ്രദേശത്തെ അശാസ്ത്രീയമായ ടാറിങ് വലിയ വെള്ളക്കെട്ടിന് ഇടയാക്കുന്നുമുണ്ട്. എത്രയും വേഗം ഇതൊരു ശാശ്വത പരിഹാരം കണ്ടില്ലെങ്കിൽ ശക്തമായ പ്രതിഷേധവുമായി മുന്നോട്ടു പോകുമെന്ന് നാട്ടുകാർ പറഞ്ഞു.