കാനയ്ക്ക് മുകളിലെ സ്ലാബ് തകർന്നു; മുടിക്കോട് സെന്ററിൽ അപകടക്കെണി

പട്ടിക്കാട്. മുടിക്കോട് സെന്ററിൽ സർവീസ് റോഡിൽ നിന്നും ചാത്തംകുളത്തേക്ക് ഇറങ്ങുന്ന ഭാഗത്തുള്ള കാനയ്ക്ക് മുകളിലെ സ്ലാബാണ് തകർന്നത്. സ്കൂൾ ബസുകൾ അടക്കം നിരവധി വാഹനങ്ങൾ കടന്നുപോകുന്ന ഈ ഭാഗത്തെ സ്ലാബ് തകർന്നത് വലിയ അപകട കെണി ആകുമെന്ന് നാട്ടുകാർ പറഞ്ഞു. സമീപത്ത് റോഡും തകർന്നിട്ടുണ്ട്. 

അമിതഭാരം കയറ്റിയ വാഹനങ്ങൾ ഇതുവഴി കടന്നു പോകുന്നതാണ് സ്ലാബിന്റെയും റോഡിന്റെയും തകർച്ചയ്ക്ക് കാരണമെന്ന് പ്രദേശവാസികൾ പറഞ്ഞു. ദേശീയപാതയോരത്തെ കാനയ്ക്ക് മുകളിലെ സ്ലാബുകളുടെ ഗുണനിലവാരമില്ലായ്മയും തകർച്ചയ്ക്ക് കാരണമാകുന്നുണ്ട്. തകർന്ന സ്ലാബുകൾ എത്രയും വേഗം മാറ്റി പുതിയവ സ്ഥാപിച്ച് പ്രദേശത്ത് സുരക്ഷിതമായ ഗതാഗതസൗകര്യം ഒരുക്കണമെന്നും നാട്ടുകാർ ആവശ്യപ്പെട്ടു.